Filippense 4:9 En wat julle geleer en ontvang en gehoor en in my gesien het, doen dit, en die God van vrede sal met julle wees.
Wat leer en ontvang en hoor en sien ander mense in jou? Leer hulle van Jesus, ontvang hulle iets van wat Hy vir die mensdom kom bewerk het aan die kruis, of hoor hulle iets daarvan by jou, en kan hulle iets raaksien van die werk van die Heilige Gees in jou lewe?
Ek meen, vir almal wat saam met my glo in Christus Jesus, behoort hierdie vers van Paulus ons te herinner aan hoe geseënd ons is dat die vrug van ons geloof in Christus ander mense kan leer van Hom, kan laat ontvang van Hom, kan laat hoor van Hom en selfs sien wie Hy is en wat Hy in ons gedoen het asook wat Hy vir hulle gedoen het!
Nes die mense in Filippi destyds by Paulus kon leer en ontvang en hoor en sien van Jesus, hoort gelowiges in Christus se lewens ook so van Hom te getuig in hoe en wat ons doen, sodat mense daagliks ook in Sy liefde wil lewe, met Sy hoop wil wandel, Sy blydskap wil dra, en Sy aanraking in hulle lewe begeer.
Dis hoekom Paulus se woorde so ’n kosbare herinnering aan ons nalaat van hoe prakties iemand in Christus leef, sodat wat ons glo Christus se dood en opstanding in ons bewerk het, verseker manifesteer dat ander daarvan kan leer en ontvang en hoor en sien!
Paulus wou hê die gelowiges in Filippi moes destyds onthou wat hulle alles in hom gesien en gehoor en ervaar en geleer het, en dis hoekom hy dit toe so prakties gestel het: DOEN DIT!
Hiervoor het Paulus die woord πράσσετε (prassete) gebruik wat beteken: “om te beoefen, om herhaaldelik ’n gewoonte te doen.”
Sien!!!!
Om in Christus te lewe is so prakties dat wanneer ons hierdie dinge DOEN op grond van wat Christus in ons gedoen het, van Hom geleer sal word, Hy gesien sal word, Hy gehoor sal word, Hy ontvang sal word en en en, die belofte is dat God self ons vrede sal wees!
Omdat Hy met ons is, leef ons vanuit Sy vrede, sodat wat ons leer en gee en laat sien en hoor juis vloei vanuit absolute vrede van God oor en in ons!
Mag elke gelowige in Christus vandag net weer herinner word aan wat ons ook by Paulus kon leer en ontvang en sien en hoor van die Evangelie, en ons, nes Paulus, so in Christus sal leef dat ander by ons van Jesus kan leer, van Hom kan ontvang, hulle Hom kan sien en hulle Hom kan aanhoor.
Amen